Sacco di Roma 2013

Guardia Svizzera PontificiaSacco di Roma, senza dubi il pli impurtont e pompus di ella veta d’in gardist. En regurdientscha vid ils 147 schuldai che han unfriu heroicamein lur veta per schurmegiar la veta da papa Clemens VII ils 6 da matg 1527.

A mi vegn quei di a restar per adina en buna memoria. Entschiet han las festivitads gia la sera avon cun ina bellezia devoziun per nus gardists e nos geniturs, celebrada dil cardinal svizzer Kurt Koch en la baselgia Santa Maria della Pietà in Campo Santo. Silsuenter ein ils geniturs vegni retschevi ufficialmein dil cumandant dalla garda, colonel Daniel Rudolf Anrig, el Cortile d’Onore (cuort d’honur).

 

d

Il di sissu, ils 6 da matg, ha in “highlight” buca spitgau l’auter:Giuramento 2013
Il di ha entschiet la damaun marvegl cun ina messa pompusa el dom da s. Pieder, celebrada dil secretari cardinal dil stadi dil Vatican, cardinal Tarcisio Bertone. Denter il grond diember da concelebraturs sesanflava era miu “plevon da casa”, sur Ignazi Pally. La messa ei vegnida embellida cun entgins sunatibas dalla garda e dil Chor Cantori Contenti dil cantun hospitont Zug. Duront quei survetsch divin hai jeu astgau leger ina dallas supplicas en lungatg romontsch:
“Lein rugar per ils gardists che prestan oz lur sarament, per nies cumandant e per tuts officiers, sutofficiers e halumbardists che stattan da di e da notg en survetsch da Sia Sontgadad il Papa, e per lur famiglias: ch’els tuts semuossien adina digns da quella honur ed adempleschien cunscienziusamein e cun plascher lur pensum en buna collaboraziun cun las ulteriuras forzas da segirtad el Vatican.”

kranzniederlegung2

Suenter il survetsch divin ei l’entira raspada serimnada sin la Piazza Protomartiri romani per metter giu in tschupi en memoria dils camerats curdai 1527.

Cuort avon gentar essan nus danovamein s’entupai cun nos geniturs. Quella gada el palast dil papa, ella sala Clementina. En quella zun custeivla e pompusa sala ha papa Francestg beneventau nus tier in’audienza. Suenter ch’el ha giu benediu la bandiera nova dalla garda ha el engraziau grondamein alla garda per il survetsch ch’ella presta di per di. Silsuenter ein tuts ils gardists, ensemen cun lur geniturs vegni presentai persunalmein dil cumandat dalla garda al papa. In mument nunemblideivel e zun impressiunont.

 

17 Zug Engirament papa-bandiera Z80 Neu_1_PAPA

Nunemblideivels ei secapescha era il mument dalla saramentaziun staus. Cunquei che l’aura era buca diltut segira ha quella giu liug ell’Aula Paolo VI. El decuors dil suentermiezdi era in grond pievel da fiasta serimnaus en quella immens’aula che porscha in plaz da seser a 6’500 persunas. Punct allas tschun essan nus gardists marschai tras la sala e semess en retscha sin tribuna. Suenter il plaid dil cumandant, Daniel Anrig che ha beneventau l’entira raspada ed il plaid da nies caplan, mons. Alain de Raemy che ha regurdau nus gardists vid la muntada da nies engirament, nota bene ina part schizun per romontsch, ha la ceremonia digl engirament entschiet. Mintgin dils 35 novs gardists ei passaus anavon, ha tschaffau la bandiera, teniu ils treis dets dil maun dretg enviers tschiel ed engirau en siu lungatg mumma. Jeu sco sulet hai fatg quei per romontsch:
“Jeu, halumbardist Beer, engirel da tener cunscienziusamein e fideivlamein tut quei ch’ei gest vegniu legiu avon a mi aschi franc che Dieus e nos sogns patruns gidan mei!”

5430_Engirament

In mument solemn, intensiv e honorific, in mument che vegn adina a restar presents en mia memoria.

Engirament Guardia Svizzera Pontificia Ueli Maurer

S’augmentaus ei miu plascher savend che mes geniturs, mes frars, schizun miu tat e mia tatta ed ina delegaziun da Sevgein seigien persents denter la gronda raspada. Ensemen havein nus suenter las festivitads gudiu ina buna tscheina e passentau ina zun emperneivla sera da cumpignia.

viadi a Roma 399_a