Onn sogn dalla misericordia

Papst Franziskus ruft Heiliges Jahr aus.
L’emprema dumengia suenter Pastgas, ils 11 d’avrel 2015, ha papa Francestg proclamau ufficialmein igl «Onn sogn dalla misericordia». Finamira ei la renovaziun dalla cardientscha. Plinavon ei colligiau cun in onn sogn in perdun particular.

Ei setracta – tenor il Vatican – d’in «Onn sogn pign, ni extraordinari». Tradiziunalmein ha in onn sogn liug mo mintga 25 onns. Il davos ei stau igl onn 2000 sut papa Gion Paul II.

 

Signet-Heiliges-Jahr

Entochen il di dad oz ha ei dau 26 onns sogns, l’emprema ga igl onn 1300. 1475 ei vegniu fixau che quel hagi da ver liug mintga 25 onns per possibilitar a scadina generaziun dad evenimentar in tal. In onn sogn extraordinari – pia ordeifer igl interval da 25 onns – ha ei dau igl onn 1933 (1900 onns suenter la mort da Cristus).

L’avertura digl Onn sogn dalla misericordia ei vegnida fixada sin ils 8 da december 2015, per la fiasta dalla Immaculada Concepziun e gest 50 onns suenter la conclusiun dil Secund Concil vatican. El cuoza entochen ils 20 da november 2016.

.
Il ritus dall’avertura digl onn sogn consista enten arver la porta sontga el Dom da s. Pieder. Igl ulteriur temps ei quella porta serrada, mirada en. Talas portas son­tgas dat ei era ellas treis ulteriuras basilicas papalas a Roma:
san Giovanni in Laterano, s. Paulo fuori le Mura ed a Santa Maria Maggiore.
Igl act d’avertura simbolisescha ina via speciala al salit.

Il davos onn sogn, proclamaus da papa Gion Paul II igl onn 2000, veva attratg ver 25 milliuns pele­grins el marcau etern. Per 2016 – igl onn giubilar dalla misericordia – quentan ins cun buca meins che 33 milliuns visitaders. Sil pli tard suenter las terriblas attaccas dils terrorists a Paris procura la segirtad ton per il marcau da Ruma sco era per il Vatican  – e per nus gardists oravontut per la veta da papa Francestg – per beinenqual «rompicapo» (rumpatesta) als cerchels politics e polizials.

Dapli informaziuns davart la porta sontga saveis leger cun far in «click» sin ils suandonts links:
Heilige Pforte
Um 23.20 Uhr öffnet sich die Heilige Pforte