Ina notg da Nadal tut aparti

La stalla da Nadal cun figuras da Napoli

La stalla da Nadal cun figuras da Napoli

Per la fiasta da Nadal han mes geniturs fatg ina viseta a mi. Per mei sco era per mes geniturs l’emprema ga che nus havein buca festivau Nadal a casa. Tonpli che nus havein schau impressiunar dall’atmosfera sin la plazza da s. Pieder e siu contuorn. Dapi ils 6 da december stat in tarment pigniel- ni plitost in pégn – ornaus cun tschiens glischs e ruclas spegl obelisc. Mintg’onn deriva il pigniel ord in’autra tiara. La sera da Nadal ei la stalla cun fetg veglias figuras da Napoli vegnida scuvretga.

 

 

Duront il Gloria ha papa Franzestg purtau sez igl affon divin avon igl altar

Duront il Gloria ha papa Francestg purtau sez igl affon divin avon igl altar

Ferton che mes geniturs ein serendi cun mellis auters concartents ella basilica da s. Pieder per festivar la messa solemna pontificala da Nadal, hai jeu entschiet cun miu survetsch da segirtad. Quella gada in survetsch tut special! Per l’emprema ga hai jeu prestau miu survetsch avon la habitaziun da papa Francestg – e quei resch persuls. Cuort avon mesanotg ei il papa arrivaus. El ha salidau mei fetg cordialmein e giavischau a mi ina legreivla e benedida fiasta da Nadal. Ed jeu, empau schenaus mo plein respect hai rispundiu: “Auguri e buon Natale, Sante Padre”. El ha lu aunc fatg attents mei da sesurvir dils biscutins ch’el hagi schau semtgar sin ina meisetta per la guardia pontificala, ha sez aunc pescau in ord la cuppa ed ei lu s’absentaus cun in surrir en sia habitaziun. Jeu sun restaus tut persuls l’entira notg avon sia porta. Mo la damaun marvegl, enzatgei avon las sis, cuort avon che miu survetsch ei ius a fin ei papa Francestg sortius da sia habitaziun e salidau mei cun in cordial “buongiorno”.

Quella notg ha fatg in’enorma impressiun a mi. Passentar la notg da Nadal resch persuls en in zuler – e pertgirar il papa. Veramein, ina notg da Nadal tut aparti!

Musica da Nadal empau nunconvenziunala

Musica da Nadal empau nunconvenziunala

L’auter di havein nus festivau Nadal da cuminonza en caserna. Suenter il survetsch divin, celebraus da nies caplan, essan nus serendi ella sala da teater. Era ils geniturs ch’eran sin viseta ein stai envidai a quella fiasta. Suenter ina gustusa tscheina ha mintga gardist retschiert in schenghetg da Nadal. Suenter ina legra producziun musicala cun bischels da plastic, dada d’enzacons gardists che fan part dalla musica hai jeu aunc giu in’uriala temps per ina paterlada avon che serender danovamein al survetsch da notg.